"સાજન, થોડો મીઠો લાગે"

હોઠ મલકે તો મોટી મહેરબાની

સાજન, થોડો મીઠો લાગે;

તારી સંગાથે પ્રેમનો અજાણ્યો

મુલક કયાંક દીઠો લાગે!

સંગાથે હોય ત્યારે અટવાતાં ચાલીએ

કે એકલાનો રાહ એકધારો,

મઝધારે મ્હાલવાનો મોકો મળ્યો, તો

ભલે આઘો ઠેલાય આ કિનારો!

મધમીઠો નેહ તારો માણું

સંસાર આ અજીઠો લાગે.

રાત આખી સૂતો કયાં સૂરજ, સવારે

એની આંખમાં ઉજાગરાની લાલી.

લથડીને ચાલતી આ ચંચલ હવાનો હાથ

ઊઘડેલા ફૂલે લીધો ઝાલી;

તારી આંખના ઉજાગરાનો

છલકાતો રંગ જો મજીઠો લાગે!